期間限定: 蘿蔔糕 & 馬蹄糕

其實上年已經想整架喇, 但係因為 Honeymoon 緊, 唔得閒....
今年就梗係要實行啦~ 咁大個女第一次整『蘿蔔糕』&『馬蹄糕』咋~

馬蹄糕其實都幾易整, 最麻煩係刨馬蹄唧(自己整得糕, 梗係買o的新鮮既自己刨啦!!)
我覺得都幾似架, 同酒樓食果o的差唔多, 不過下次可以落少o的糖, 咁就無咁甜喇~
 

至於個蘿蔔糕囉喎... 原來好麻煩架, 我淨係做洗洗切切+爆鑊都玩左幾個鐘...
加埋蒸既時間, 足足玩左成日.... 真係唔知係我個食譜太講究丫, 定係人人都係咁整喇....
不過今次好勁丫, 我出動埋阿Kenwood仔, 所以刨蘿蔔無難度, 兩三下手勢就搞掂晒!!
初步識食, 味道唔錯, 啖啖都係蘿蔔肉, 料又足, 同街買既好唔同!! 搞咁耐都值既!!
 

我仲好巴閉咁一次過整左3底蘿蔔糕, 2底馬蹄糕!! 不過自己就每樣得一底唧, 其他都係俾媽媽既.... 想食既朋友就好早o的黎我度拜年喇, 『期間限定』食晒就無架喇!!!

Wedding Cake

一路都好想學 Cake Decoration, 今次有幸跟 Miss Ho學野, 得益良多.
我都真係好有心學架, 每次都由『鬼地方』打的出旺角, 都咪咪話唔貴...不過值得既!!!
我對個作品都幾滿意, 唯一係佢『爆擦』得較嚴重, 下次有機會再做, 應該會好o的
成個蛋糕, 除左個花蕊同絲帶, 成個都食得架!! 等我遲o的切開黎食先~

 
 
 

薑餅屋

原來我已經有好一段日子無update 呢度...
最近比較忙, 不過都有久唔久整下餅既~ 首先送上一間薑餅屋~
整既時候危機重重,  怕佢倒下... 不過最後個效果又okay喎...