聖誕薑餅人 - 冬裝篇

由於有唔少人話上次既Ginger Bread好夏天, 想睇睇佢地既冬裝喎...
所以就整左呢批薑餅人喇~
 
今次o的薑餅落少左薑粉, 但係就加左玉桂粉, 所以就比上次深色, 同埋香好多~
雖然有幾隻仲係著緊吊帶小背心, 但係大部份都換左冬裝, 帶左頸巾架喇... 哈哈~

Season's Greetings

剛剛收到一位朋友的eCard, 好得意丫~~ o的企鵝係度滑黎滑去~~
多謝你呀, 我估唔到會收到你既eCard架.. 哈哈哈~

想睇o的企鵝滑黎滑去?! click下幅圖啦~~

新玩意 - Pingu 杯碟

keke, 又係我晒禮物既時候喇...
呢對杯碟係我一個好朋友係日本買俾我架, 係咪好靚呢~~~
唔好以為佢只係一套普通既杯碟喎, 佢係Pingu 25週年既特別版, 要係『Mister Donut』度買四條卷卷, 再加1000yen先有得換架...
不過我個朋友就好犀利, 淨係放低1000yen就拎到兩套杯碟+4條卷卷返黎, 勁呀!!
 
靚女~~~ 多謝你呀~~~

新玩意 - Pingu 小冰屋

呢個係一個朋友仔送俾我既生日+聖誕禮物, 係咪好得意呢?! 個個都有唔同造型架~
多謝你呀朋友仔~~~~~
 
 

祝‧永遠幸福快樂

數天前, 好朋友結婚了, 我特地為佢做左一張結婚咭...
好耐都無整過呢o的野喇, 唔知佢見到會有乜反應呢, 會唔會嚇親?! hahaha...
(突然諗起多年前另一創意之作: 維他檸檬茶盒... 等我睇下搵唔搵得返張相先 =P)

基本上呢張咭係由三張咭組成, 分別係主咭, 西裝貼紙 & 婚妙貼紙
可能咭主會覺得好奇怪, 點解我會有佢12年前張相?!
原因好簡單... 我處心積慮, 係好耐之前已經用部手機影左囉~~ (呵呵... 小心o的我呀!!!)

除左個結婚公仔, 我覺得段字都好正架, 多得某某幫手諗, 如果唔係我實無得訓~ *_*

以下係全文引述:

 

恭喜你地經過左三年又三年, 三年又再三年, 到左第十年, 終於都拉埋喇!

葉ｘｘ先生, 雖然我地素未謀面, 但係麻煩依家望住身邊既老婆仔, 同佢講：『以後就由你去照顧我喇!』

葉李ｘｘ, 麻煩你都講番句：『一世人兩公婆, 我實照(顧)你既, 不過麻煩你都照(顧)返我o番!』

葉先生夫人, 希望你地將呢張咭放係全屋最當眼位置, 每日跟住指示做一次, 有時間就做多幾次, 有病醫病, 無病補身!

祝願兩位永遠幸福快樂!

 

唔知阿葉先生夫人, 有無跟足指示做呢??

聖誕薑餅人

又到聖誕~ 又到聖誕~
 
仲有十數日就到聖誕節喇~ 為左加添氣氛, 我特地整左『Ginger Bread』~
隻隻既造型都唔同架, 係咪好得意呢?! :DD
 
不過佢地唔夠深色, 下次等我用埋玉桂粉先~

焗番薯仔

食完個 Lunch 無乜野做, 見到廚房有幾個番薯仔, 所以就拎左去焗喇...
唔駛講, 就梗係好味啦, o的番薯仔個個都好甜~
有焗爐既朋友仔不妨試下~

是日午餐 - 芝士鹹牛肉焗薯

其實呢個 Lunch 已經係上個星期食架喇.. 只係一路都唔記得post上黎
 
講返個焗薯...
其實做法好簡單, 焗好個薯仔之後, 放o的炒過既鹹牛肉上面, 再加o的芝士, 焗多兩三分鐘就食得!
又易整, 又好味~ 我係 Super Sandwich 好多時都係叫佢架~
我妹妹仲一口氣食左兩大個落肚添.. 勁呀~
 

[中國‧香港] 廟街煲仔飯

唔好以為我呢個人淨係識得食貴野喎, 其實只要係好食既, 我乜都食架~
//hum 唔係邊得黎咁肥丫.. 呵呵呵~

早幾日我先同個friend去左廟街食煲仔飯, 勁好味丫~

你知啦, 呢o的地方唔係人人都肯同我黎食架嘛, 所以已經好耐無黎過喇...
無黎兩年, 佢規模大左好多, 多左好多間舖, 仲乾淨左唔少~ =p

我地叫左個『潤腸排骨飯』&『滑雞飯』, 仲叫左個『蠔仔餅』~
唔駛講.. 梗係好味啦, 特別係個滑雞, 一o的都唔靱, 好滑, 好正~

keke... 由於太肚餓, 所以食到半路先記得影相~  :P

[中國‧香港] 太平館餐廳

上兩個星期同o的 friend 去食飯, 諗左好耐都諗唔到食乜, 最後突然醒起『太平館』...

已經好耐無去過喇, 去到梗係叫晒佢o的招牌菜啦~ 我地一行六個人總共叫個三個餐, 佢地包括:
- 太平館瑞士雞翼
- 太平館干炒牛河
- 太平館燒乳鴿
- 焗蟹蓋
- 焗葡國雞飯
- 焗海鮮意粉

唔好以為我地就咁就肯收手喎, 有我係度既地方, 當然唔少得甜品啦~ 哈哈~
我一去到, 就點左個招牌梳乎厘喇! 難得六個人去喎, 點可以唔叫架~
佢大到真係嚇死人, 同一般既梳乎厘好唔同, 質地實實地, 但食落又好軟喎~ 正~
下次等我試埋佢個焗西米布甸先~ 佢要六點前落order架, 真係巴閉!

爭o的唔記得講, 係未食正餐之前, 我地仲叫左個『蝦多士』, 都好好味架!! =D~

碎朱古力曲奇

整完蛋糕仔, 突然想食曲奇餅, 所以就整左呢個『Chocolate Chips Cookies』~
 
今次係跟美味DIY個食譜整既, 除左碎朱古力粒, 仲加左杏仁片, 所以特別香脆~
雖然係overcook左少少, 但係仍然好好味, 好快就俾人食晒喇~ :DDD

香蕉蛋糕仔

本身打算整Lemon Mini Cake, 但係整到中間先發覺屋企支檸檬汁變壞左 -_________-!!
所以就轉左整『香蕉蛋糕仔』&『雲呢嗱蛋糕仔』

由於係臨時變卦, 所以無落香蕉黎整, 只係用左香精黎取代~
雖然o的味唔算話好好, 但係用佢地黎做聽日既早餐都唔錯既~~ :D

 

Pingu 25th 週年紀念碟

到左手喇~~~ :DDDDDDDD
 
之前托個朋友幫我去日本買呢隻Pingu碟返黎, 終於都到左手喇~~ 隻碟超靚丫, 我遲o的會拎佢黎載我o的製成品架喇!!! 呵呵呵~~
 
多謝你呀!!! 靚仔~~~~~~~~~~~~~~~ /(^_^)\

蛋糕書

一向我既食譜都係上網搵既, 但係唔知點解近排鍾意左買書, 可能係想玩o的高難度少少既cake呱~
 
前排商務大減價, 我都掃左幾本返黎.  本身係想買『法式藍帶廚藝學院』出既法式糕點 I & II, 但係又覺得佢太舊, 所以就揀左另一本喇.  其實去到書局, 我只會留意兩類既書: 煮食書 & 旅遊書. 完全乎合晒我既人生目標, 就係...吃喝玩樂 XD
 
我揀Cake Book 有幾個條件: 首先o的Cake一定要靚, 仲要有埋橫面結構圖, 唔係一般既Cake咁簡單, 佢入面要有唔同餡既, 咁我先會買架. HAHA... 等我show show近期既戰利品先~
1) 法國糕點盛宴 - 巧克力 & 蛋糕
2) 法國糕點盛宴 - 小糕點 & 塔派
3) 超人氣名店的西點
 
KEKE... 書就買左幾本喇, 遲o的搵時間practice下先~ 呵~

[中國‧香港] 大家樂一哥火鍋船

第一次去快餐店打邊爐, 我揀左大家樂既『鮑螺片大蝦肥牛鍋』&『肥牛雜錦鍋』
兩個人叫左兩隻船, 本身都驚會食唔晒架, 但係食下食下又食得晒喎~

不過呢, 我就唔覺得好食喇, 始終材料好局限, 我鍾意食既金菇就得幾條, 但係唔鍾意食既米綫就有好多~  而且個湯底真係唔得囉, 個沙爹湯都無味既, 不過就幾欣賞佢既魚麵, 第一次食, 感覺幾新鮮&得意~

2006 Pingu 手帳

買左喇, 買左喇~~~
2006年既 Pingu 手帳同月曆已經到手喇~ 呵呵呵~ XD

士多啤梨雪糕鬆餅

哈哈, 你無睇錯, 佢地真係由雪糕整成架~~ XD

係我雪緊o的甜撻皮期間, 由於無乜野做, 所以就整左呢個『Ice-cream Muffin』喇~
佢既製法真係易到你唔相, 我只係用左五分鐘時間, 就溝好晒o的材料, 放得入焗爐喇~
非常非常適合懶人!!! 而且佢唔駛用牛油, 我估會應該比一般既Muffin健康既 :P

今次呢個係用左士多啤梨味既雪糕, 焗左出黎成個紫心番薯咁, 幾得意架~ 哈哈~
 

鮮果撻+栗子撻

今日整左『Fruit Tart & Chestnut Tart』~ 個賣相係咪好靚, 同出面既餅店有得揮呢?

原來佢地都幾花時間, 頭頭尾尾都整左我幾個鐘...
成個過程, 最辛苦就係唧栗子條條, 要好大好大力先唧到佢地出黎...
最後我仲索性唔用唧咀, 就咁係個唧袋穿幾個窿黎唧添~ :P
佢地好好味呀, 所以咁辛苦都值得既... :DD

只係我媽媽話:『整得咁辛苦, 出面十蚊都有四個啦~』, 真係俾佢激死~ -___-!!!

轉變

很喜歡網友『白糖糕』既一篇文章, 所以特此引述一用...

我覺得呢幅圖好有意思丫, 每個人都應該不斷嘗試轉變.
um... 唔知我幾時可以從一個IT人, 轉變成為Cakeshop 老闆呢~

<-- 發夢中

引述:  轉變

近期手作仔

唧唧複唧唧, 木蘭當戶織.
 
唔好似為我淨係識得食喎, 其實我仲識好多野架~~ 呢個就係我近期既手作仔 - 米白色長頸巾喇~
個花係咪好靚呢?! 織得好辛苦架~ 依家仲有1/4 先織完, 唔知趕唔趕得切今年冬天纜呢~~ 
小恩子!! 加油呀!! XD
 

[中國‧香港] Häagen-Dazs 雪糕火鍋

今日終於試左 Häagen-Dazs 既雪糕火鍋喇!! 超好味丫~ 佢個火鍋底係由朱古力&士多啤梨汁組成, 配料就有大量既生果, 四種口味既雪糕(曲奇, 士多啤梨, 朱古力 & 哈密瓜) 同埋一o的曲奇餅&蛋糕.  朱古力醬係最好味既, 無論點邊樣配料都好fit~

唯一問題只係... 食咁多朱古力同雪糕落肚, 好肥丫~~~ 哈哈哈~

一閃一閃小星星

每年臨近哈囉喂, 我地一眾玩得埋既同事都會出黎一聚, 而每次都會有一o的驚人既新發現.  今年已經係第三年喇, 今次比較特別, 唔係一般既飯局+飲野, 而係去左大拗門BBQ.  試想想, 星期五晚上, 荒山野嶺真係鬼影都無隻, 幾切合哈囉喂架...
 
其實今年我係唔應該去的, 因為突然發病, 發高燒之餘仲喉嚨+扁桃腺發炎, 醫生仲千叮萬囑叫我唔好食煎炸熱氣野, 試問咁又點去BBQ丫.  但係由於我有大無謂既精神, 加上我又真係好想同呢班人一齊去玩喎, 所以一於少理, 最多都係玩完病多兩日唧.. XD
 
不過由於我病病地不在狀態, 加上對某o的事無平日睇得咁豁達, 所以我既心情唔算得上靚.  後來又因為無乜食慾, 個人悶悶地,  所以就自己一條友行左上山, 散下o的悶氣.  一出到去, 即時俾天上既繁星吸引!!! 個天真係靚到嘩一聲, o的星星好似包圍住你咁, 加上月亮伯伯咁岩放左假, 所以特別光, 特別亮~ 我地仲見到好幾粒流星添, 當時大家都忍唔住訓晒係地下度數星星, 個場面都幾搞笑架~ 而每次有流星經過, 我地都會唔記得左許願, 一路都只係識得『嘩!嘩!!嘩!!!』
 
繼係南非之後, 呢次都可算係見得最多星既一晚, 而且仲係第一次見到流星添!!  佢同時亦引起左我睇星既興趣, 令到我好想買架車仔, 成日走去郊外睇星星!!!! 

大閘蟹

今日真係有少少罪過. 成日都不停咁食野, 真係想瘦都幾難~ :P
 
除左食自家製甜品+Lunch之外, 我仲食左隻由遠方買來既時令食品 - 『大閘蟹』.  呢隻已經係我今年既第二隻喇, 睇怕quota都已經full左, 我既膽固醇指數又會再次上升喇~ =P

法式劇院蛋糕

今日除左整左個好豐富既Lunch之外, 我仲整左個『Opera Cake』~

呢款蛋糕平時就係o的高檔cake shop見得多, 但係我就未食過, 更加未整過. 
今次新手上路, 成績都算滿意, 但係decoration方面仍須努力. 
個朱古力面整得唔靚, 而且整左好耐都整唔到把朱古力扇...  -___-

haha... 不過我都仲未試味, 始終對咖啡製品興趣唔大, 所以都唔知好唔好食.  :P
P.S. 最後我妹妹仲用o的剩餘物資整左個卷蛋出黎.. 勁!

 

是日午餐 - 天使麵 + 雞翼 + 蛋撻

由於有朋自遠方來, 所以今日既午餐特別豐富, 整左幾樣野食, 佢地分別係:

1. 茄汁磨菇腸仔天使麵
2. 蜜汁雞翼
3. 酥皮蛋撻

頭果兩款無乜特別, 基本上都熟手技工架喇.  至於個酥皮蛋撻就係第二次整喇, 由於吸取左上次既經驗, 今次o的酥皮整得特別靚, 而且仲好鬆脆添(唔信的話, 睇睇Closeup, 真係好多層架) ~ 最後, 我仲用左o的剩餘物資整多左兩款小食: 1) 焗蛋 & 2) 三個酥. 

其實.... 個三個酥係未焗之前, 我覺得佢有o的似..... 一條under~  haha XD