簡單蛋糕

其實除左整曲奇之外, 我今年仲整左另外兩個蛋糕...
一個係『香蕉蛋糕』, 另一個係『焦糖蘋果蛋糕』

我一向都好鍾意呢兩款蛋糕, 清清地又快手, 加上又岩老人家食~
而且焗果時果陣香味真係好好聞, 尤其係香蕉蛋糕~ :DD
好... 等我遲o的整返o的muffin先~ 好耐無食過喇~

 

唧花牛油曲奇

我已經好耐無再整餅喇, 除左忙之外, 仲因為無左一班我愛既同事係身邊...

最近... 認識左一位新朋友, 佢都係整餅愛好者, 睇見佢日日整餅, 令我再次心動~
前晚溏心飯局, 咁岩傾開整餅, 佢就俾左一個『 唧花牛油曲奇』既食譜我~
老實講, 曲奇一向都係我既弱項, 次次整親都硬掘掘, 一o的都唔鬆化...
好喇, 既然收到新食譜, 個人又心郁郁, 所以一於唔理咁多, 即刻開爐作法~

呵呵~ 製成品話咁快就出世, 而且仲好掂添~ 我從未試過o的餅咁脆架!!!
我仲跟足指示, 用手指篤餅底黎 ensure 佢夠唔夠熟... 呢招真係好work!!
我好貪心咁整左兩隻味道: 雲呢嗱 & 檸檬!! 兩個都好好味~ 柏琪... 多謝你呀~
 

關西之旅 Day 11 - 空港 + 後記

相片: 關西空港

T.B.C.

關西之旅 Day 10 - 東福寺 + 京都駅

相片: 難波, 東福寺, 京都駅, 四条

T.B.C

關西之旅 Day 9 - 保津峽 + 嵐山

相片: 保津峽, 龜岡, 馬崛, 嵐山, 四条

T.B.C.

相關資料:
近畿紅葉とれたて便: http://www.rurubu.com/season/autumn/koyo/area.asp?area=4
嵐山 嵯峨野トロッコ列車: http://www.sagano-kanko.co.jp/index.php
かづら野 清修庵 (豆腐料理): http://seisyuan.com/kadurano.htm

關西之旅 Day 8 - 祇園 + 清水寺

相片: 二条, 祗園, 八坂神社, 清水寺, 四条
 
T.B.C.
 
相關資料:
清水寺: http://www.kiyomizudera.or.jp/aki.html

關西之旅 Day 7 - 有馬 + 天保山

相片: 有馬, 天保山, 海遊館, 心斎橋

一朝早起身, 我地又再一次去浸溫泉~ 之後就去餐廳食我地既豐富早飯~
我地就勁喇, 有龍蝦做湯底, 不過呢... 我覺得味道好一般咋, 都係鍾意白浜條燒魚多o的~ =P
食飽飽, 我地執埋o的行李, 就checkout離開旅館, 到附近既小店行行, 不過就無收穫~


之後, 我地又再展開漫長之旅, 出返大阪, 去位於【天保山】既【海遊館】睇企鵝!!
不過睇企鵝之前, 首要任務就係醫肚~ 所以見到有燒墨魚丸當然唔會放過啦~
 跟住我地仲去左好出名既【北極星】食蛋包飯添~ 真係好好味架~ :DDD
 

食飽飽, 我地就去探朋友~ 海遊館都有唔少品種既企鵝架~ 有o的好hea, 有o的就係度打交~
我地仲見到一隻出世只有25日既小企鵝添~ 全身黑色, 毛都未甩, 唔講都唔知佢係企鵝丫~
除左企鵝, 我地仲見到海底聖誕老人, 都幾得意架~ 真係日本人先諗得到~ :P
不過好老實講, 我覺得海遊館無乜野睇... 除左企鵝之外, 海洋公園絶對勁過佢好多好多~
唯一比較可取既, 就係賣手信既既地方, 真係好多好多野買架, 企鵝軍團!! 勁勁勁!  XDD


探完朋友我地就出返難波 hea, 首先係去B1 食甜品, 今次食左個Opera + 吉士新地 (成日都食 :P)
跟住就去左【高島屋】Shopping~ 我仲係【ポール・スミス】, 睇中左件桃紅色大褸添~ 不過由於太貴, 所以無買到~

我地又再一次shop到人地閂門, 跟住就去左附近既【Pepper Lunch】醫肚, 叫左兩份鐵板肥牛~
佢地o的set真係好抵架, 1000円都唔駛就有雪霜肥牛既質素, 下次再去日本, 都要再搵幾食~
就係咁, 我地就完成左大阪遊, 明日開始就去古城【京都】喇~ :DDD

 

相關資料:
海遊館: http://www.kaiyukan.com/index.html
OSAKA海遊きっぷ: https://www.kotsu.city.osaka.jp/information/ticket/benri/kaiyu/18/kaiyu_2006.html
鐵板霜降牛扒Pepper Lunch: http://www.pepperlunch.com 

關西之旅 Day 6 - 姬路 + 有馬

相片: 姬路城, 好古園, 有馬

經過幾日既大阪遊, 今日轉移陣地, 去較遠既【姬路城】同【有馬溫泉】~
其實都幾遠架, 由大阪去姬路大約要兩個鐘車程, 不過為左睇真正既古城, 都值得既~
我地一早就帶住疲累既身軀&少量既行李出發, 經過千山萬水, 終於係中午時份到逹~

姬路城都真係既壯觀架, 無論近景定遠景, 影出黎既相張張都好似postcard咁...

而且呢度係大奧既主要拍攝場地, 到處都係城堡同日式園景, 好有【德川幕府】既色彩~
其實感覺幾得意, 由一個繁榮既都巿慢慢行到去一座古城, 好似入左時光隧道咁~ =P

不過由於太曬, 所以只影景, 無影人 (都怪有人掛住自己shopping, 唔俾我買太陽眼鏡啦 >_<)
經過多座城門同曲折既山路, 我地慢慢爬到【天守閣】 (真係爬的, 因為樓梯斜度超過60度)
不過上到頂樓360度望晒成個姬路城又真係幾靚既~  我地仲係姬路城附近見到【十月櫻】添~
去完【姬路城】, 順道過埋隔離既【好古園】, 但係我就覺得無野睇, 完全係晒錢晒時間 =_=
 

行完古城, 我地又再返回現實... 搵食!! 我地去左一間拉麵店食我地既早午餐+下午茶...
雖則我唔鍾意食拉麵, 但係呢間都算做okay架喇~ 我地叫左兩個叉燒拉麵, 仲有一碟餃子(1700円)
食飽飽, 我地就再一次展開漫長之旅... 入【有馬】喇! (我記得有人仲想入PS, 要鬧佢先肯走 =_=)

去到【有馬】, 都差不多七點半, 我地唯有直接去旅館【陵楓閣 】, 第二日先周圍行啦~
我地首先去浸溫泉...  佢地都幾得意, 男女浴場每日早晚會對調, 等大家都可以享受唔同既風呂..
跟住我地就食豐富既懷石料理, 我仲加左 3675円要多隻伊勢海老添(個頭第二日仲拎左黎煲湯)
不過呢, 我覺得個餐 so so咋, 箱根【對星館】好食佢好多, 相對地間房亦比較大&新~
 

食飽飽無野做, 我地就靜雞雞係自己個內園度玩花火(係白浜帶黎既)...
我仲一時忘形, 差o的燒著左隻浴袍... 不過煙花又真係幾靚幾好玩既~~ =P
 

相關資料:
陵楓閣: http://www.negiya.jp/shukuhaku.html

關西之旅 Day 5 - 池田 + 神戶

相片: 池田, 三宮, 神戶港

今日既節目好特別, 就係... 整杯麵!!! 係.. 你無睇錯, 杯麵都可以親手整, 仲好得意既添~
我地一早就搭車去到池田既【日清杯麵博物館】, 佢既展館有講解公仔麵既發展進程&演變.
不過我地無join佢既公仔麵製造見學(i.e. 自己炸麵條), 因為全日文之餘, 亦非常難book...
所以我地就玩左自製杯麵(300円)~ 整既方法好簡單: 1) 係自動販賣機俾錢買杯 + 消毒雙手...
2) 用你既創意係隻杯畫公仔 3) 俾隻杯姐姐等佢幫你壓個麵入去 4) 揀餸&湯底 5) 封蓋+包裝
佢仲有個吹氣 Packing添~ 就係咁... 一個獨一無二既杯麵就誕生喇~ :D :D :D
我地好努力咁畫畫畫, 最終整左七大個杯麵~ 其實想整更多, 不過時間有限, 畫唔切....
我地仲將其中兩個製成品斜"咩"係身, 不知引黎幾多人既羨慕目光 (連日本人都問我地係邊整)~ XDD
 

為左整杯麵, 我地比原定schedule晏左離開, 差唔多兩點半先去到三宮既【ステーキランド ＫＯＢＥ】
今次真係弊傢伙, 趕唔切叫set既話, 散叫價錢會貴兩倍... 我地唯有扮傻, 用英文死話要set lunch~
點知佢又肯喎.. 我見隔離個日文menu已經收晒o的 set lunch牌, 係英文menu先仲有咋~~ yeah~
我地叫左一份和牛+一份普通牛 (共5460円), 兩個都超級好食~ :D :D

食飽飽, 我地就去shopping喇~ 有人又再瘋狂購物~ 我地仲同靚靚sales姐姐影相添~
之後我地就去左【Sweet Harbour】~  一個集合全國好多蛋糕/甜點店舖既地方!
不過呢... 我完全覺得有受騙既感覺, o的cake好唔得, 無特色, 百貨公司B1果o的靚佢幾廿倍~ -_-
最後我只係要左個北海道牛乳布甸~ um... 都叫okay好味, 牛奶味好重~
 

之後我地去左【Mosaic Harborland】, 不過就無乜野睇, 又無乜野食吸引...
所以我地影完神戶港個摩天輪, 同埋一o的夜景就閃人, 出返去梅田搵食~
我地去左【あじびる 花心 】諗住食關西風すき焼, 但係唔知點解變左sabu-sabu 放題 (@2700円)
不過唔緊要啦, 一樣照殺! 因為已經超肚餓, 我地仲食左好多好多碟添~ 都叫唔錯~
 

相關資料
日清杯麵博物館: http://www.nissin-noodles.com/index_new.html
ステーキランド ＫＯＢＥ: http://www.sankita.com/store/store_page.asp?mem_num=39
Sweet Harbour: http://www.beeskiss.com/sweets_index.php

あじびる 花心: http://www.shonan-inet.or.jp/~chiba/kurau.htm

關西之旅 Day 4 - 奈良

相片: 千日前, 黑門巿場, 奈良, 難波

今日.... 又繼續郊遊, 去既係近近地既奈良~ 途經道頓堀, 千日前 & 黑門巿場.  :D
去到【道頓堀】, 我地影左個固力果地標就走人喇, 因為日抖白白無乜野好睇~
不過有間舖頭超多人, 望真o的, 原來係彈珠店, 日本人真係唔食飯都要玩彈珠機~ >_<

行去千日前途中, 竟然俾我見到【Mister Donut】, 雖然我地無早餐budget, 但係一於少理, 食左至算~ :P
佢既 Donut 都真係幾好食架, 平均都係100円一個, 不過最衰佢呢期無 Pingu 換丫 -_-
食飽飽我地就去左【千日前】 shopping, 去既原因好簡單, 為左買廚具.. XDDD
不過無乜收獲, 反而買左好多聖誕節精品, o的野平得好緊要, 百貨公司賣緊成千円既野, 呢度只係二百円~
行完千日前就去左【黑門巿場】, 不過完全無野睇, 連少少吸引既食物都無, 唯有提早入奈良~ =_=

去到奈良, 第一件事當然係搵食啦, 入左一間日式炸物連鎖店【頑固】度食, 非常好味~
特別係炸蠔, 超級好食, 而且佢既芝麻醬係自己調配, 有得食又有得玩, 我最鍾意~ :D
  

之後, 我地就起程去【東大寺】, 果度有好多好多好靚既紅葉, 亦有串串金 (我改既名 :P)
除此之外, 亦有好多好多鹿... 不過佢地真係好現實架, 當你有餅俾佢食既時候, 就會成群咁圍你...
仲會用鹿角頂你pat pat, 迫你俾餅佢食  (好彩隻鹿角俾人磨平左咋 >________<!!)
但係當無晒餅既時候... 佢地就話之你, 散都散唔切.. 現實到不得了... 連俾你摸下都唔肯!!!
跟住我地就去左【奈良公園】度 hea, 接住再去【春日大社】.. 直至入黑~
 

反轉左個奈良之後, 我地就出返去難波 shopping, 又再一次 shop到shop無可shop先肯收手..
跟住就去左【もんじゃ 麦 】諗住食文字燒, 點知無枱, 老細本身想唔做我地生意...
不過我地死纏唔肯走, 最後佢先肯做埋我地咋~ 我地點左店內頭兩碟熱賣黎食..
師傅炒兩炒就食得, 雖然個形態唔似燒餅咁, 係一pat pat 的, 但係真係好好食...
第一碟好得, 係超級至尊, 好好味, 不過第二碟係芝士明太子燒, 太滯, 我地食唔晒~
不過佢杯乳酸可樂真係好得, 原因咁溝都得架喎, 等我遲o的又試一先~ 食飽飽我地就返歸喇~
 

相關資料:
Mister Donut: http://www.misterdonut.jp/
もんじゃ 麦 (文字燒): http://r.gnavi.co.jp/k214500/

關西之旅 Day 3 - 白浜 + 梅田

相片: 円月島, 白浪浜, 崎之湯, 梅田

經過兩日黎既充實活動, 今日既節目相對地 hea~ 要休息下嘛~ =P
我地住既民宿有包早飯, 我地食埋先出發~ 其實都幾好食架, 係燒魚黎, 好地道~ :D
食飽飽我地就徒步行去【円月島】影相喇~ 不過因為懶, 無行到好近, 因為無乜好影...
本身schedule 噚日日落黎既, 等個咸蛋黃係正個窿窿度, 不過趕唔切丫... 唯有影日景啦~
 

影完相, 我地就去左【白良浜】hea~ 成個沙灘無乜人, o的沙真係好白好幼~
係附近既士多仲有得賣『花火』添, 雖然日頭白白, 但係我地都買左黎玩...
不過因為太光, 乜都睇唔到... 但係我地都買左一大pack打算去有馬時再玩~ =P
 

之後, 我地去左白浜好出名既【崎之湯】浸溫泉. 每人都係300円咋.... :D
佢就巴閉喇, 對正太平洋, 個view靚到無得頂.. 不過據聞男賓果邊會俾燈塔既人望晒~
keke.. 我係入面偷影左幾張相, 其實有幾張係有其他人架, 只係我避開左~ =PPP
hea 左咁耐, 又係時候食飯喇... 今次我地去左沙灘附近食: 牛肉飯 & 咖喱豬扒飯(1,800円)
兩樣都不過不失... 食飽飽之後, 我地返民宿拎埋o的行李, 寄埋postcard 就搭車出城喇~
 

經過三個鐘既車程, 我地又去到梅田喇.  黎到呢個百貨公司之地, 就梗係shopping啦~
首站係【阪神百貨】, 我地再一次shop到天昏地暗, 到人地打烊先肯走人.... XP
臨走時就勁喇, 你去到邊, 四周既職員都會向你90度鞠躬, 仲會送你送到電梯口..
o的服務態度好到不得了, 搞到我地都唔好意思...  之後, 我地就去左 【Hep Five】繼續掃貨...

係所有舖頭收晒之後, 我地唯有去搵食!!! 今次去既叫【蛸之徹】, 專玩自製墨魚丸~
墨魚丸就食得多喇, 未試過自己整, 我呢o的無聊人又點會錯過丫... 680円 有12粒~
其實都幾好玩架, 仲好好味添~ 我見隔離枱玩埋炒麵添呀, 好似都幾得意~ =P

唔好以為我地食完墨魚丸就收手, 呢個只係前菜...  =P
我地本身打算再去食火鍋, 不過因為太夜人地唔做生意... 所以唯有轉陣去【魚心】~
佢有好多間分店, 一條街都有幾間, o的壽司好大件, 仲好新鮮添!! 我地食左大約十碟(4680円)
最最最欣賞係佢既玉子壽司, 大大舊蛋, 入面包住幾粒飯, 型到呢...  XDDD
 

食飽飽, 我地又再返酒店喇... 唔好以為咁就去訓喎.... 我地仲要食埋甜品 XDD
基本上每次去百貨公司, 我都必行B1, 亦即食品部... 見到靚既cake都會買定黎做宵夜架.. 呵~

相關資料:
蛸之徹 (燒墨魚丸): http://www.takonotetsu.co.jp/index2.html
魚心(元祖ぶっち切り寿司) : http://www.ajibil.com/uoshin/

關西之旅 Day 2 - 白浜

相片: とれとれ市場 , 三段壁, 千畳敷, 白浪浜 & 銀座通

為左趕得切入去白浜食 Lunch, 我地晨咁早就出發, 趕搭 8:10 班直通巴士~
都咪話唔辛苦, 噚日先 5 點起身趕搭飛機, 今日又晨早趕搭車... >_<
不過無法啦, 為左食我乜都肯制架喇.... :D~~~

經過三個鐘既車程, 終於入到白浜喇... 嘩!!! 個天真係靚到呢~~~~ :DD
一落車, 我地就去左【とれとれ市場】, 佢有好多平價海產發售, 所有野都係即叫劏...
我地仲見到佢劏大 Toro 添~~ yummy~~ 經過四圍巡視, 我地最後買左:
鰻魚壽司(780円), 象拔蚌, 赤貝, 烏貝, 帶子(1890円) & 中上拖羅各一(4210円)
唔駛講, 就梗係好好味啦~ 象拔蚌非常鮮甜, 拖羅就入口即溶~ 超正, 咁早起身都值得既!!
 

飲飽食醉之後, 我地就四出買手信.. 跟住就搭車去下一站【三段壁】& 【千疊敷】~
其實呢度最主要都係睇山山水水, 欣賞下大自然既景色, 乘機 hea 下~
我地係度玩左好耐, 擺左好多古怪posts, 就咁係, 話咁快就日落喇... :DD
 

本身我地諗住慢慢行去【白良浜】睇日落, 點知個咸旦王落得真係好快....
我地去到都係岩岩趕得切咋.. 有人為左影相, 掉低晒o的行李, 係沙灘度狂奔添~ XD
由於set唔切腳架, 所以o的相普普通通咋... 但係就好好玩~ 不過個早抖一落左, 就開始凍喇...
 

我地去民宿放低o的野, 跟住又再去搵食喇... 本身以為【銀座通】好熱鬧啦, 點知死城咁...
望左好耐, 最後入左一間日式飯店開餐, 叫左豬肉Shabu, 唐揚定食 & 牛肉烏冬 (3000円)
三樣都好好食~ 食完我地諗住去沙灘放煙花, 但係搵極都買唔到, 所以最後唯有放棄...
返到民宿, 我浸左陣風呂就訓喇..... :D
 

相關資料:
南紀白浜温泉: http://www.nanki-shirahama.com/index.html
南紀白浜の海鮮市場: http://www.toretore.com/tore/
白浜定期觀光バス: http://www13.ocn.ne.jp/~meikobus/teikan/index.html
民宿Ａコース (白浜温泉): http://www.a-course.co.jp/index.html

關西之旅 Day 1 - Rinku Premium Outlet

相片: 空港, Rinku Premium Outlet & 酒店

由於時令賞楓季節, 加上去成十幾日咁多, 為左減低成本....
我揀左乘搭至平既 Air-India 去大板, 雖然搭印航係有o的怪, 但係真係平好多...
唯一問題係.... 佢只得星期三/日有機, 去既日數有所局限, 而且仲要係飛 07:30am 添~

由於晨咁早就要飛, 所以五點鐘就要起身梳洗, 飛的入機場~ (真係眼訓到呢~ @_@)
我地六點三就去到, 點知 check-in 果時, 姐姐話班機好full, 要分開坐!! >__<
唉... 無法啦, 香港係中途站嘛... 我地幾經辛苦先爭取到前後位咋....
由於班機 delay 左一個鐘, 我地無野做四圍行, 行下行下去左 Dinsey Store 買豬女..
就係咁,  呢個 trip 既主旨因而改變, 因為不知不覺間.... Shopping God 已經隨行~ XD

我地 12:40 去到關西空港, 搞掂晒o的手續之後, 第一時候唔係搵車搭, 而係去人地推介既【青木松風庵】
去做咩? 之唔係買芝士蛋糕同巨峰糯米糍囉~ 我仲即場落 order, 訂埋手信响最後果日返黎拎添~
不過由於轉季, 走果時只會有士多啤梨而無巨峰..  不過對我黎講仲好啦, 一次過試晒兩隻味~ =D
(結論係.. 芝士蛋糕真係無敵, 超超超好味, 兔大福都好好食, 但莓一衣就唔夠巨峰好味喇~)


買完甜點之後, 我地又繼續搵食... 去左空港其中一間食肆食烏冬&海鮮丼(1500円), 不過味道好一般. =(
跟住...  買埋嵐山既車票, 我地就起行去第一站 【Rinku Premium Outlet】喇~
本身諗住果邊一定有 locker, 點知 full 鬼晒... 結果要抬行李行一條長長既樓梯.. 真慘...


去到 Outlet 之後, 我地就 Shopping God 上身, 買左好多好多野 (正確o的講, 係人地買左好多野 =P)
結果搞到天都黑齊, 先去搵飯食.  係 Outlet 都有唔少選擇, 我地揀左好耐, 先決定去一間日式食店..
由於已經非常肚餓, 我地好快手就叫左個日式饅魚煲仔飯&薄切豚肉生姜燒鍋定食~ (3160円)
兩款都非常非常好味, 我最愛個饅魚飯, 要加茶黎食, 好得意, 但亦好好好好味~ =DDDDD~


食飽飽我地就閃人, 唔經唔覺已經九點四. 結果....去到【ミーイン 心齋橋】酒店已經差唔多十一點...
嘩... 間房細到真係嚇死人, 連轉個身都有難度, 好在個 toilet 尚算乾淨... 鬼叫我地無錢咩....
由晨早五點捱到依家, 仲要搬搬抬抬, 真係攰到死下死下... 所以沖完涼, 報完平安就訓喇...
當然... 訓之前要食埋個宵夜先啦~  個芝士蛋糕真係超好味到呢~~~ :D~~~


相關資料:
青木松風庵: http://www.shofuan.co.jp/index.html
Rinku Premium Outlet: http://www.premiumoutlets.co.jp/rinku/index.html
ミーイン心齋橋: http://www.hotespa.net/hotels/shinsaibashi/