講開企鵝, 唔知大家近排有無去過『奧海城』, 果度依家聚集左數百隻企鵝係度求偶/覓食, 佢地係人都唔放過, 包圍左成個商場... 呢o的企鵝好惡架, 佢地為左爭食, 乜都做得出, 以下係我見過既例子:
企鵝爭的士事件
依家係的士站入口, 大約有三十隻企鵝聚集, 每當有的士駛入而其中一隻企鵝起步追既時候, 其他企鵝都會一致響應, 包圍成架的士. o的企鵝會左推右撞, 為求zip位, 不擇手段. 隨之, 三度車門同時會被打開, o的企鵝會不停遞上傳單黎求偶..... 而車中事主根本就落唔到車, 我仲聽見佢不停係車內叫喊『痴線架, 唔俾人落車, 痴線架!! 痴線架!!』... 咁都未算, 當尾隨既另一架的士駛入, 有一隻醒目既企鵝搶先走去搭訕, 當然同時亦引黎另一批企鵝跟住去啦. 係呢個時候, 我突然見到果隻醒目既企鵝心灰意冷咁回頭, 原來..... 係架的士入面, 已經載住左另一隻企鵝, 佢仲以皇者姿態走出的士添(勁!!)... 跟住其他小企鵝就散開晒, 返去之前果架的士度繼續求偶喇... 場面之誇張, 唔係親眼目睹, 都唔相信.....
企鵝爭仔事件
其實依家已經甚少人會朝向TrendyLand果邊行架喇, 因為果邊係企鵝既密集區, o的企鵝會對你虎視眈眈. 但係我就見到有個傻佬拖住女友好大膽咁行去果邊, 一如預計, 一班企鵝即時埋身肉搏圍住佢地. 當事人仲打算以速度衝出重圍, 當然o的企鵝亦唔輸蝕, 築起企鵝牆, 阻擋去路, 迫左佢地埋柱. 結果.... 佢地唯有乖乖就犯....
睇左咁耐, 唔明我講乜?! 你睇下幅相就明架喇..... XD
仲係唔明?! 等我講得白o的啦..... 我口中所指既『企鵝』, 其實係指『地產經紀』. 佢地隻隻都西裝骨骨, 不停向路人求偶(sale 樓盤). 而且佢地成堆咁聚埋一齊, 十足十一堆企鵝圍埋係度取暖. 由於sale到一個樓盤分分鐘可以分成十皮, 所以佢地都相當之搏命....
奉勸各位無乜特別事, 千祈唔好去奧海城一帶出没.... XD
0 comments:
Post a Comment