[中國‧香港] Cafe Serena

呢幾日, 我除左去左迪迪尼, 仲去左Hotel Nikko Hong Kong 既 Cafe Serena 食 Dinner Buffet~

佢個規模好細下, 得好少選擇, 冷熱盤都只係得幾款, 又無生蠔喎, 比較可取係有龍蝦唧...
而我最著重既dessert呢... 不過不失啦, 但係味道唔算得上好好...
最好味係個木槺布甸, 而o的chesse cake 大約有我5成功力啦 XDDD

一個咁既buffet, weekday 都要收成$265一位, 我真係唔明點解o的人會去?
我唔係有免費coupon, 真係唔會去幫襯丫~

香港迪迪尼

襯呢幾日放假, 我終於都去左香港迪迪尼喇!!  呵呵呵~
 
由於今次係打友情牌, 所以入場唔洗$$.  而且仲因為係平日, 成個場都無乜人, 就連『飛越太空山』, 『巴斯光年』及『小熊維尼』呢o的勁多人玩既遊戲, 都唔駛排隊, 通通即刻有得玩! 正! :D
 
我地今次就犀利喇, 所有遊戲/景點/表演都玩晒, 有o的仲玩左兩次添! 而當中最好玩既, 竟然係『瘋帽子旋轉杯』! 無法啦, 我地呢班人係癲架嘛, 起勢係咁轉, 其他杯仔停晒既時候, 我地隻杯仲轉過不停. 落黎果陣, 真係差o的企唔穩架! XD
 
由於一切太順利, 所以我地真係要四圍HEA, 先等得到佢放煙花.  但係都值既, 個煙花真係唔錯, 幾靚, 幾特別.  香港迪迪尼雖然係細左o的, 但係平日黎反下, relax下又真係幾唔錯既, 特別係响唔駛$$既情況下~ 呵~ 我諗我下次再黎, 都要係幾年後既事喇~ :P
 
keke, 又想睇相?! 黎呢樹『Ping 香港迪迪尼一日遊』啦~

泰國文化之旅

其實一路都好想去泰國行個轉, 近近地, 又唔貴, 加上可以嘆SPA~  係一個唔錯既relex 選擇..
今次仲要係跟公司去添, 真係估都估唔到~ 哈哈哈~ XD
 
第一次去泰國, 佢俾我既印象係... 熱熱熱, 無乜地方特別值得去... -_-;
至於食物嘛, 一般般啦, 除左第一間去既餐廳比較地度, 其他既都唔太有特色, 可能係鴨仔團既關係呱~ :P
 
不過亦因為咁, 佢帶左我去唔少具有文化特色既地方.  其中最欣賞既, 莫過於『SIAM NIRAMIT』.  佢係曼谷一個相當有水準既大劇院, 舞台設計真係好掂. 除此之外, 仲好識利用成個場景, 令觀眾異常投入. 
 
成個旅程, 比較遺憾係去唔到weekend market... 呢個亦都係促使我會再去既原因.  當然, 仲要去埋『The Oriental Thai Cooking School』啦~ 呵呵呵~
 
想睇相嘛... 可以去 『Pinga 泰國美食文化之旅』度望下~ 不過今次影左好多少咋, 因為Pinga 唔可以成日浦頭嘛, 呵呵呵~
 
 

Mister Donut

Mister Donut 又出左新既Pingu CM喇, 好得意架~
 
http://www.misterdonut.jp/tvcm/meta/062d300.asx

[中國‧香港] 太平山餐廳

好... 等我打返o的回憶錄先~

係情人節前既果個星期日, 我約左一班好友上山頂慶祝生日.  果日都幾凍架, 我地坐係『太平山餐廳』既outdoor, 都咪話唔好feel~  由於係情人節前夕, 附近有唔少情侶.  不過佢地就唔好彩喇, 遇著我地呢班無聊人係隔離嘈嘈閉, 真係乜feel都俾我地破壞晒. 呵呵呵~

講返o的野食先~ 我自己就覺得唔錯喇, 如果唔係都唔會山長水遠上去啦.  我地叫左以下幾款食物, 我覺得個拼盤同個湯都唔錯, 但個main course就唔太好食. 而最好食既, 當然係個dessert啦~ 係凍冰冰既環境下, 食個暖笠笠既朱古力蛋糕, 配埋個雲呢嗱雪糕喎, 真係超正~

Appetizer & Soup: 龍蝦湯＋印度芝士香草烤包, 太平山拼盤

Main Course: 牛膝燴意大利飯, 印度乳酪烤雞, 炭燒羊架

Dessert: 焗蘋果脆批伴雪糕, 暖心朱古力蛋糕

丫, 有樣野要提提, 就係佢地既service比兩年前差左好多, 唔知係咪因為果日多客, 好明顯人手不足~

2006 年春裝

哈, 又係時候換季喇~ 除左我自己之外, 我張床都換左喇~
今次既主題非常之岩我, 真係唔買都對唔住自己呀~ 呵呵呵~

Mister Donut

好耐都無post過文添, 今次就等我同大家介紹下『Mister Donut』啦~
 
佢係一間係日本專賣Donut既舖頭, 全國有唔少分店~ 我自己就未食過, 唔知佢好唔好食.
不過佢有一樣野好吸引我, 就係佢久唔久會有Pingu既Product換/送.
 
上過月就係飯盒 + 帶飯袋, 而今個月就係換調味盒 + 碟~ 呢兩樣我都好想要, 真係有o的想飛過佢添! >_<
 
佢個CM都好得意架, 大家有時間可以睇下~
http://www.misterdonut.jp/tvcm/meta/062b300.asx
 

榛子朱古力 + 朱古力脆糖

又到左古古力月, 為左應節, 我都學人整左o的古古力俾大家食~ :D
 
其實我一路都覺得整古古力好無謂, 因為只係將佢轉變做唔同既形態...
但係唔整都唔知, 原來控制溫度都幾麻煩架~ 
今次我用左Valrhona 70%既古古力, 所以整體上都幾苦下~ :P
 
為左搞搞新意思, 除左『Hazelnut Chocolate』之外, 我仲做左『Chocolate Crisp Candy』~
其實我都唔知佢算唔算係糖, 不過食譜係咁寫, 我就咁打啦~ :P
佢食落脆脆地, 而中間就煙煙靭靭, 個口感都幾得意架~
哈哈哈~ 其實都唔知會唔會係因為我焗得唔夠耐咋 XD

鮮果撻

由於屋企既士多啤梨存貨實在太多, 所以我又開始整餅喇~

本身打算整Cake, 但係又無乜心水, 突然諗起某人超級喜愛食『Fruit Tart』, 所以就決定整佢喇~
今次既Tart好簡單, 只係用左士多啤梨, 奇異果&蜜桃, 總共整左18隻~
keke... 邊個想食既, 就好係呢兩日搵我喇, 送完即止, 不設預訂!

[中國‧香港] Habitu - The Pier

岩岩見吉吉哥一連post左幾篇文, 搞到我都有o的手痕~ 呢間食肆想同大家介紹好耐架喇, 但係一直都懶, 唔願寫, 就等我襯呢個機會介紹下啦~

唔知大家有無留意係海運大廈入口, 有幾間食肆呢? 其中一間叫『HABITU - THE PIER』, 我覺得唔錯架! 佢係一間意式西餐廳, 主要係sell Pizza, Pasta 同扒.  最特式既, 莫過於沿用炭爐焗Pizza 同埋個view喇.  雖則個view唔算得上話好好, 但係話晒都對正成個維港, 一路食飯, 一路睇『幻彩詠香江』都唔錯架. 

而Pizza 呢, 我就覺得係Must-Try Item 喇.  佢o的Pizza 有別於其他舖頭, 非常之薄, 就算兩個人去食一個, 都唔會話好飽.  而且仲非常之好味(四式芝士Pizza除外 :P), 我自問就無能力整到喇.  除此之外, 佢o的Pasta 都唔錯, 特別係最basic果款意粉(好似叫Spaghetti Carbonara), 乾乾地身, 加埋o的芝士, 好好味~

仲有, 仲有, 佢地除左食野, 仲有得飲野架.  佢有一個露天既地方俾三五知己坐埋一齊飲下酒, 吹下水同埋欣賞下維港景色.  如果唔飲酒既話, 可以試試佢既『蜜糖薑茶』, 真材實料, 又暖胃, 又潤, 非常正~ 至於價錢呢, 佢應該係屬於中檔喇~ 兩個人去食, 大約$300度啦~

新年曲奇

由於搬左新居既關係, 今年新年特別多人黎我屋企拜年~
為左招呼各方親戚朋友, 所以特地整左『榛子曲奇』&『碎朱古力曲奇』守門口, 等大家黎到可以試試~
keke... 雖則整得唔算好, 但係都不過不失啦~ (開始對自己整既野無要求)

Chocolate Charlotte Fruit

古古力, 是為女子既天敵. 身為義氣子女既我們, 點可以俾佢為害人間.
所以特此舉行『古力屠殺大會』, 將古古力趕盡殺絶. XD

話明係屠殺大會, 當然係乜野食材都加入古古力啦~
今次我地轉左個Charlotte Fruit做朱古力味, 由手指餅, 海綿蛋糕到慕斯都係古古力! 勁呀!!

不過由於我地太心急, 雪得唔夠耐就將個蛋糕分屍, 所以o的慕斯唔夠實, 中間仲有下陷既情況.
但係唔緊要丫, 最緊要好味嘛, 哈哈哈!  XD

是日午餐 - 白汁波菜雞絲貝類粉 + 芝士蒜蓉焗生蠔

哈~ 今日係屋企搞左個整餅聚會~ 但係响未開始之前, 我地就已經不停咁食食食~ XD
 
首先登場既係『焗白汁波菜雞絲貝類粉』, 本食想用蟹肉, 但係周圍都買唔到, 我又懶得自己拆咁大工程喎, 所以就用左雞絲代替~ 而o的白汁呢... 係真料實料自己整架!! (今次無出貓 XD)
 
食完個意粉, 晏少少我地就上左第二道菜『芝士蒜蓉焗生蠔』. 焗蠔係街就食得多喇, 但係自己整都係第一次.  來貨價要4蚊一隻, 我覺得都算幾抵, 只係買既地方比較隔涉... keke, 等我下次試下唔同既焗法先~
 
我自己就覺得兩款都好好喇, 唔知班試食團又覺得點呢?

Happy Feet

雖然要等到十一月, 但係真係諗唔到理由唔去睇呢套戲丫~~ 好!! 我等你!! XD





Website: http://www2.warnerbros.com/happyfeet/
Trailer: http://raincloud.warnerbros.com/wbmovies/happyfeet/happy_feet_teaser_100.asx

(多謝 Stephanie 既介紹!! :D)

X'mas 歐洲鴨仔之旅 - 美食篇

德國
其實我地係德國唔係話食左好多餐, 不過最特別既, 莫過於係嘉年華會買既『熱葡萄汁』&『士多啤梨香蕉朱古力串』.  葡萄汁佢地分含酒精&不含酒精兩種, 我地兩隻都有飲, 不過我就覺得不含酒精果種好味好多.  試諗下... 果度凍冰冰, 又落住雪, 手拎一杯好好味既熱葡萄汁, 真係幾好feel架.  另外串古古力都好好味, 特別係士多啤梨, 佢個心係經過特別處理, 好Juicy, 好正~ 我地仲叫老細引入香港, 一定有得做!

 
瑞士
黎到瑞士, 點可能唔試佢既芝士火鍋呢~ (其實係香港都食過幾次架喇, 當然我係講緊正宗果款, 而唔係意粉屋果o的啦~) 不過今次比較特別, 叫左Fondue Bourguignonne, 亦即係用芝士油+肉炸黎食(唔好問我乜野係芝士油, 佢咁講, 我咁聽架唧, 我一路都懷疑係普通菜油).  食法好簡單, 只需要用竹籤叉住o的肉/魚, 放落o的油度炸40sec, 再點上醬汁就食得架喇. 味道嘛.... 我覺得唔錯, 只係比較熱氣&油唧, 不過既然黎到, 點都要試下既~~ :P

 
法國
留係法國既時候係最耐, 所以亦都食得最多好野... 首先要講既係响波本食既法國蝸牛豬扒餐, 雖然佢既賣相唔係太得, 但係個味道真係唔錯, 蝸牛同豬扒都好好味, 配埋o的小粒通粉, 幾特別架~

 
講起法國, 不得不提响 Champs-Elysées 『chez Clément』食既法國海鮮大餐, 真係超超超正丫!! 由於我地唔識法文, 而o的waiter又唔係太聽得明我地講乜, 所以我地就唯有憑我地既智慧叫野食喇.  係指指點點既情況下, 我地叫左一大盤『Oyster and Shellfish』同埋一份『Cheese Fondue』.  當份海鮮上枱既時候, 全場嘩然, 因為實在太大盤喇 (我地本身以為好細份架咋).  o的蠔同o的貝類都超級新鮮, 只不過係比較多沙, 我自己就最鍾意隻蟹, 好好味!!  而個Cheese Fondue 呢... 一上枱就嚇左我地一跳, 因為同預計既唔同, o的芝士係凍食既... 我地研究左好耐都唔知點食, 就咁食o的cheese又太膻, 所以食左一半就放棄左喇 (其實隔離枱都係食呢樣架, 只不過我地唔知原來叫既係同一款, 所以無留意佢地係點食咋 -_-!!) 總結黎講, 呢間餐廳真係唔錯, 唯一問題係o的位好窄同埋佢地唔識英文唧~ 至於食左幾錢嘛... 我覺得真係幾抵, total 連埋白酒都係 EUR 62.. 係香港淨係食o的海鮮都過千啦~

 
由於食得太多肉, 所以今次就揀左『PAUL』度食Lunch, 佢其實係一間Cake Shop+Cafe, 型式同『LADUREE』差唔多, 但係價錢就相差好遠喇! 我地分別叫三文魚沙律&番茄火腿三文治, 兩樣都唔錯, 個飽上面有魚子醬添架! 另外, 個set lunch仲包一款dessert+一杯餐飲, 所以都幾抵~

 
 
其實成個trip都真係食左唔少好野架, 上面既只係一部份, 想睇多o的可以去『Pinga 炸仔 歐洲鴨仔團』本相簿望下.  基本上, 呢個trip我食得最多既就係cake, 話晒法國甜品喎, 我又點會放過呢~ :P
至於我肥左幾多磅嘛, 呢個問題我唔會答架喇... 呵呵呵~

X'mas 歐洲鴨仔之旅 - 感想篇

注意事項:

1. 妹妹(=Pinga)出門前必須做身體檢查. 事原今次歐洲之旅, 途中發現佢隻左眼甩甩地, 為免之後既相全部要影佢3:7臉, 所以最後花左CHF$7.9 (~HKD$50), 買左支3M超能膠幫佢做急救.  你睇下我對佢幾好丫.. XD
   
2. 去旅行之前, 必須查清楚當地係咪假期. 事原26/DEC係德國法定假期, 我地去到成個死城咁, 所有舖頭都唔開, 有得睇, 無得買. 好橙... (無手信既, 唔好怪我呀! =P)

難忘事件:

1. 第一次同吉吉哥去旅行丫, 哈哈哈.. (唔知佢係邊個?! 佢咪係炸仔個媽媽囉~)
   我諗經過今次X'mas之旅, 佢會對我重新評估架喇.. 哈哈哈~
   
2. 當小妹第一日去到歐洲, 身在德國海德堡, 已經見到第一場雪喇~ 雖然唔係第一次過白色聖誕, 但係都好有Feel丫~
   
3. 當o的雪越落越大, 我伸出雙手去接住, 想影一張舖滿雪既相.  就係呢個時間, 一個身穿運動短褲既中年人跑過(當時氣溫只有一度 @_@;). 佢無啦啦跑埋黎, 俾個"十"我, 我即時呆左, 唔知俾乜反應佢好... 之後佢仲伸出雙手企係度, 我就唯有俾返個"十"佢, 佢先至好開心咁跑走去~ 我同吉吉哥都呆晒... 不過吉吉哥好勁, 影低左成個過程~
   
4. 其實今次旅行, 我主要係負責照顧妹妹&炸仔. 有一日既朝早, 吉吉哥問我:『炸仔呢?!』 當時我搵極都搵唔到, 就建議:『不如睇下o的相, 最後係邊個拎住佢架啦!』(好明顯, 我係嘗試推卸責任啦! 哈!) 點知... 真係發現炸仔最後係zip住係吉吉哥條褲度影相!! 我即時成個人鬆晒, 而吉吉哥亦有『炸仔流落異鄉』既念頭... 不過好好彩, 當我地落到去reception, 就見到炸仔俾好心人執返, 放左係度.  我果時都唔知幾想拎支粉筆出黎, 幫佢畫個案發經過.. 哈哈哈~~
   
5. 唔好以為我帶公仔去旅行變態喎, 同行既團友都係咁架, 佢地帶左隻熊仔, 所以我地叫佢地做『熊仔爸爸&熊仔媽媽』.  真係估唔到妹妹係歐洲都識到朋友仔. 哈哈~ 不過我就唔肯定佢地係因為見到我影妹妹好得意, 所以先係瑞士買隻熊仔丫, 定係係香港帶去 =P
   
6. 我同吉吉哥半夜無無聊聊走左出房, 去左砌雪人~ 雖然唔算得上好靚, 但係都好得意架!! 不過好老實講, 當我摘o的樹枝既時候, 我真係驚佢地會返黎搵我架~~ :S
   
7. 去到巴黎無耐, 我部Pentax就無啦啦壞左喇 (我都無跌過佢!!) 好彩我地拎左兩部機唧... 不過亦因為咁, 妹妹&炸仔係巴黎影左好少相咋. 因為我部機主要係影佢地+食物, 而吉吉哥果部就係負責人+景~ 不過好彩返到香港, 我部機FIX返喇.  至於點解會壞嘛, 仍然都係個迷, 好多人都係同我一樣情況, 無啦啦壞左, 所以我懷疑呢個係Pentax既陰謀, 呃support錢.
   
8. 每當我無無聊聊既時候, 就會拎住炸仔幫佢配音, 主要既MESSAGE都係:『媽媽~ 媽媽~ 下次記得帶埋我去旅行呀~~ 我真係好鍾意去旅行架~』 吉吉哥俾我搞到笑到流眼水.  最後, 我地仲幫妹妹+炸仔配音, 拍左成幾分鐘Video添~ 哈~
   
9. 其實巴黎既物價真係好高丫, 一杯汽水都要成 EUR3.9. 所以我返黎之後, 成日都話:『LV好抵丫, 100罐可樂就買到一個SPEEDY30喇 (即係通街都見人拎既中型手挽袋)』 XD
   
10. 第一次係飛機上面Count Down, 當時o的空姐仲唱埋歌添. 至於係計邊度時間嘛, 就當然係香港啦~
    
11. 2006年第一次嘔, 竟然係响飛機上面. 由巴黎返香港, 要13個鐘, 不過好不幸, 頭果3個鐘都不停遇著氣流, 唔俾人郁, 亦唔俾人去廁所.  加上坐係機翼附近, 好嘈同郁得好犀利, 所以食完個晚飯就開始唔妥, 訓極都訓唔返, 仲有o的想嘔添... 不過由於我坐係埋面, 又見吉吉哥訓著左, 所以就費事嘈醒佢. 最後食完個早餐, 終於都頂唔順, 去左toilet 嘔. 事後同吉吉哥講返, 原來佢都係一樣, 所以我地有o的懷疑個晚飯係有問題!  至於我搭乜野機嘛? 咪係好出名既CX囉~

X'mas 歐洲鴨仔之旅 - 手信篇

我呢個人, 去到邊都掛住食架啦... 手信就更加唔駛講, 通常都係以食為主...
無法啦, 德個瑞士法國... 根本就無乜特色手信可言~
我又未富貴到可以買LV, GUCCI返黎做手信... 唯有買食架啦~ 哈哈哈~ XD
 
Macaroon 蛋白杏仁餅... 唔知有幾多人食/聽過呢? 煮甜品既人應該會識得佢, 因為佢係法國一種幾出名既小食, 主要係由蛋白做成, 有好多唔同既味道.  我揀左法國一間幾出名既餅舖『LADUREE』買左o的返黎~ 佢有好多隻味架, 不過食落有少少甜, 但係都唔錯丫, 只係貴左o的唧~~ 
(一粒Macaroon 相等於一個魚柳飽... 下次都係等我自己整好過喇...=_=)
 
除左 Macaroon, 我仲買左好多古古力返黎... 不過大部份都係响法國買, 而唔係瑞士 :P
我每隻大牌子都有買丫, 因為隻隻都想試嘛, 佢地分別係:
1) 香港好出名既 GODIVA
2) 煮甜品既人唔會唔識既 VALRHONA
3) 法國先有既 MAXIM'S
 
我仲未試呀.. 不過望個樣就好好味喇~~
你地邊個想食既就好快o的見我喇, 唔係到時俾我食晒/派晒, 就唔好怪我喇~~ 哈哈哈~~

X'mas 歐洲鴨仔之旅

今年既聖誕節, 本身打算去『迪迪尼』, 但係突然間去左歐洲(德國, 瑞士&法國)行左個轉...
由俾人撩起去旅行, 到落實俾錢+出發, 前後唔夠兩個星期~ 勁呀~ XD
 
本來我個Friend係話去『紐西蘭』 (My Dream Place!!)... 但係由於太貴, 兩邊都係Peak Peak Peak Season, 所以最後都打消左, 轉左去從未踏足過既歐洲大陸~
佢比想像中平丫!! 無法啦, 天寒地凍, 日短夜長, 無乜人肯去呢o的地方過X'mas架咋.. 哈哈哈~
 
成個Trip都幾好玩, 只係o的團友比較古怪, 成日都話要食炒飯 =__=!!! 搞到坐隔離食緊法國大餐既我無晒feel! 不過其中一兩Pair團友都叫做岩玩, 特別係阿『熊仔爸爸&熊仔媽媽』~~ XD
 
睇相嘛.. 可以去『Pinga 炸仔 歐洲鴨仔團』度望下~~ 不過果度只係subset, 因為我部相機中途壞左!! =___=!!! Pentax!! 你好野!!
 
keke.. 經過今次既經驗, 下次我會係夏天自由行黎玩多個Round架喇, 你等我呀!!! 呵呵呵~~