焦糖蘋果蛋糕

由於屋企有好多青蘋果, 所以就整左呢個『Caramel Apple Cake』~
焗既時候有陣陣清香~ 正呀~
 

北海道手信

哈哈哈... 我哥哥同嫂嫂去完北海道Honey Moon, 買左好多手信俾我丫~~ 

• Ping Fruit Jelly: 呢個竟然仲有得買~ 好開心丫~~ :DDD


• 六花亭士多啤梨古古力: keke, 呢個專登落order既~ :P


• Cake Box: 好靚~ 好靚~~


• 白之戀人朱古力屋Box Set: 呢個勁丫, 有晒材料同圖板, 教你整古古力屋仔!!!


• Penguin Finger Puppet: 呢個又係勁得意丫!!!

哈哈, 由於我有好明確既喜好(i.e. Cooking & Penguin), 所以我哥哥特別買得多野俾我~
雖然佢買唔到我order既Pingu T-shirt, 但係佢買既古古力屋同Finger Puppet, 我都超鍾意丫~
佢仲話白之戀人果度有專人教你整野食添架, 搞到我好想去丫~~

超級芒果船

由於屋企既雪糕存貨大增, 為左減輕雪櫃叔叔既負擔, 所以就整左呢隻『超級芒果船』~
佢既材料就巴閉喇, 有芒果啫喱, 新鮮芒果肉, 芒果雪糕同埋芒果汁, 勁呀~

楊枝金露

呢排o的芒果真係好當造, 所以忍唔住又買左o的返屋企~
今次用左黎整『楊枝金露』, 味道就普普通通啦, 都係稻香果o的好味o的~

是日午餐 - 焗芝士茄汁長通粉

其實今日既午餐係Pizza 既延續... 將用淨既材料整左呢個『焗茄汁長通粉』...
入面既材料就多喇, 有番茄, 磨菇, 洋蔥, 辣肉腸同火腿~ Yummy~

[中國‧香港] Sabatini Ristorante Italiano

係5.1 勞動節, 我又去左食好野... (其實我成日都去食好野  :P)

今次我去左帝苑酒店入面間『Sabatini Ristorante Italiano』食意大利野...
佢既環境氣氛都幾好, 而且所有野食都唔錯...
1. 風乾火腿蜜瓜
2. 白松露生牛肉
3. 雜菜湯 + 雜菌湯
4. 燒羊扒
5. 波士頓龍蝦意大利飯 + 配炒雜菇

我特別喜愛佢既燒羊扒, 真係好食到不得了, 而佢個雜菌湯都唔錯架, 好有菇味之餘亦唔太流, 洽到好處~ 而個生牛肉都幾得意, 只不過我真係唔知邊o的係Truffle, 我諗其實佢只係用左White Truffle Oliver Oil~ :P

其實佢o的dessert都幾出名架, 不過因為太飽, 所以無叫到~ 最後淨係要左o的朱古力~

蜜蜜燒雞翼

近排又開始整返野食, 搵返唔少人生樂趣...

 
不過整得太多甜野, 都想食返o的咸野... 所以就整左呢個『蜜蜜燒雞翼』!
雖然佢係咸點, 但係由於我落左唔少蜜糖, 所以都幾甜架.. 不過我媽媽都話好食~ :D

栗子蛋糕

就到母親節, 見我媽媽上次食芒果蛋糕食得咁開心, 所以今日整左佢既至愛『Chestnut Cream Cake』俾佢~

今次係我第一次整Cream Cake, 個decoration 都係自己做架~ :D
我淨係批cream 都批左好耐, 唧完又再唧, 反覆玩左幾次, 我諗個樣都算合格呱~ :P
我見個cake 寡得滯, 所以特登加左個朱古力牌俾佢... 當係同我媽媽預祝生日啦~ haha XD

btw, 為左無咁悶, 我特登係個蛋糕中間加左層朱古力脆脆落佢, 令到個口感好o的 :P
  

是日下午茶 - 芝士辣肉腸芝士薄餅

完完全全係肥仔餐, 好高卡路里, 落左好多好多芝士.. :P

芒果啫喱乳酪芝士餅

要數當時得令既生果, 都應該係芒果喇... 依家又平又靚, 最適合用黎整蛋糕~ :D
亦因為咁, 所以我噚日就整左呢個『Mango Jelly Layer Cake』!!

haha.. 淨係睇個樣就已經夠照啦, 都真係幾靚架, 多得我妹妹幫我做decoration.
初初我係打算用芒果茸係個cake上面整心心圖案架, 不過你都見啦, 完全未到家, 所以最後都係要用o的芒果肉黎遮醜~ :P

呢個蛋糕口感幾特別架, 中間有一層啫喱, 唔會話好重芝士味, 唔錯唔錯~
當你打橫咁切黎食, 仲有6個層次添: 1) 芒果, 2)啫喱, 3)乳酪芝士, 4)啫喱, 5)乳酪芝士 & 6) 餅底.. 勁呀~ :D
 

是日午餐 - 鹹牛肉焗薯

又黎個簡單放便既Lunch先~
今次整左咸牛肉焗薯, 加埋sour cream, 好好味丫~
始終覺得用佢黎配焗薯係最襯既! :D

鮮果撻

噚日去左朋友屋企hea, 由於唔想兩手空空, 而佢又曾自稱超喜愛食Fruit Tart, 所以就整左8件過去喇~
一如以往, 我整既野就算唔食得, 都睇得, 個賣相都呃得下人架! XD
不過平心而論, 今次個Tart 既 Custard無乜味, 下次都係唔好溝粉喇 :P

[中國‧香港] Royal Garden Cake Shop

自從文華東方開始裝修, 要數全港數一數二既酒店餅舖, 『帝苑』都應該名列前矛喇...
佢既糕餅總廚 Tony Wong, 來頭都唔少架! 唔知佢係邊個?! 佢咪係成日上電視, 敎人整dessert, 又出書, 又做訪問既靚仔大廚囉~

上幾個星期, 朋友特地去左Royal Garden Cake Shop 買左幾件餅俾我~
    1) 什果拿破侖, 2) 栗子撻, 3) 歌劇院蛋糕 & 4) 朱古力蛋糕

食完之後, 覺得Regala既Napoleon 比佢仲要好食.  可能因為外攜既關係, 個皮已經淋晒. 始終 Napoleon都係要新鮮先至好味既.  至於個Opera 就超勁咖啡味, 我個friend就話好得喇.  而當中我覺得最好味既, 就係個Chocolate Truffle Cake.  佢外層做得好靚, 賣相一流, 食落亦好古古力, 食完會想再食! 下次如果再去買餅, 我一定會揀佢! :DD

[中國‧香港] 三上日本料理

前日難得阿哥請食飯, 近近地去左深水埗好出名既『三上日本料理』~
果度好鬼勁架, 超多人排隊.  如果唔係book左位, 我諗要等成個鐘先有得食!  不過每位就要order minimum $100 既野食喇.  由於今次爸爸媽媽都有去, 所以就偏重叫熟食...

1. 三文魚 + 牡丹蝦 + 活赤貝刺生 ~ $196
2. 碗仔刺 + 沙律 ~ $108
3. 鹽燒鯖魚 ~ $38
4. 燒銀雪魚 ~ $60
5. 北海道燒生蠔 ~ $68
6. 網燒牛扒 ~ $68
7. 什菜天婦羅 ~ $28
8. 鐵板帶子 ~ $45
9. 美國金菇牛肉鍋 ~ $60
10. 原隻龍蝦雜菜粥 ~ $168 (特價)

唔駛講, 樣樣都好好味~ 而我自己就比較欣賞個鯖魚, 抵食之餘, 味道亦好特別~
當然個燒蠔味道亦一流啦, 個經理仲好識做, 自動幫我地upgrade左做七隻, 勁!
唔好以為只有main item先好味喎, 佢既配菜都唔錯架~ 好似係鐵板帶子上面既芽菜咁, 都非常入味架~
另外不得不提, 個龍蝦粥真係超巨型, 比起酒樓既翅仲要大窩, 我地一行七人, 每人有成兩大碗, 真係想唔飽都幾難, 而呢個亦係我爸媽全晚既至愛!
總括而言, 三上係一個唔錯既選擇, 食物質素好, 價錢亦合理, 久唔久黎一次都真係幾好架~

麥提莎夾心曲奇

嘻嘻.. 我呢個煮食狂又點會只係整一款甜品咁少丫..
除左個朱古力蛋糕之外, 我仲整左網友 starryear 既名作.. 『夾心曲奇』!
 
今次我用左『麥提莎』黎做餡, 個效果都唔錯架, 煙煙靱靱...
只不過有少少overcook, 所以出黎既口感比較硬... 同埋整唔到好似starryear果o的咁圓碌碌... :(
我要繼續响 starryear 學習先得!! 

古典朱古力蛋糕

已經有成兩個月無整過野食喇, 襯住今個復活節, 我點都要出山架喇!!

由於無乜材料係屋企, 所以整唔到Pizza & Egg Tart...
本身想整芒果蛋糕, 但係又唔得閒出去買芒果喎, 所以最後就整左呢個『Classic Chocolate Cake』喇!
呢隻蛋糕我都係第一次整架咋, 睇落個賣相都唔錯, 希望好味啦~

[中國‧香港] Regala Home Dessert

如果要係銅鑼灣食好味既Dessert, 首選當然係位於西武入面既『Regala Home Dessert』啦!
早兩日去開果頭, 咁岩又未食lunch, 咪走去嘆返個tea set 囉~
由於唔係太肚餓, 兩個人叫左個『Deluxe Tea Set + 雜莓果茶』share黎食~

個set都幾豐富架, 一共有7款甜品, 賣相一流, 不過味道就比以往失色, 可能唔係全部都係招牌菜呱...

• 栗子撻 & 芒果撻 - 栗子蓉好幼滑, 好好味 :)
• 法式燉蛋 - 一般般啦, 幾好食既 :)
• 芒果拿破侖蛋糕 - 好好食, 即叫即整, o的酥皮好脆, 我每次都叫架... :D
• 歌劇院蛋糕 - 又係好好味, 好古古力~ :D
• 忌廉泡夫 - 太甜喇... :(
• 藍莓芝士蛋糕 - 食唔到芝士味 :(

 另外... 不得不提, 個『雜莓果茶』都唔錯架, 成壺咁上, 又好味, 又抵飲~

Pingu Fruit Jelly

I hate Mister Donut!
 
次次都係咁, 係我o的朋友離開左日本先出o的好野, 今次既『Pingu Fruit Jelly』好吸引丫...
你早一個星期出, 就已經到左我手啦....  黑人憎!!! 
 
 

[中國‧香港] Cafe Serena

呢幾日, 我除左去左迪迪尼, 仲去左Hotel Nikko Hong Kong 既 Cafe Serena 食 Dinner Buffet~

佢個規模好細下, 得好少選擇, 冷熱盤都只係得幾款, 又無生蠔喎, 比較可取係有龍蝦唧...
而我最著重既dessert呢... 不過不失啦, 但係味道唔算得上好好...
最好味係個木槺布甸, 而o的chesse cake 大約有我5成功力啦 XDDD

一個咁既buffet, weekday 都要收成$265一位, 我真係唔明點解o的人會去?
我唔係有免費coupon, 真係唔會去幫襯丫~

香港迪迪尼

襯呢幾日放假, 我終於都去左香港迪迪尼喇!!  呵呵呵~
 
由於今次係打友情牌, 所以入場唔洗$$.  而且仲因為係平日, 成個場都無乜人, 就連『飛越太空山』, 『巴斯光年』及『小熊維尼』呢o的勁多人玩既遊戲, 都唔駛排隊, 通通即刻有得玩! 正! :D
 
我地今次就犀利喇, 所有遊戲/景點/表演都玩晒, 有o的仲玩左兩次添! 而當中最好玩既, 竟然係『瘋帽子旋轉杯』! 無法啦, 我地呢班人係癲架嘛, 起勢係咁轉, 其他杯仔停晒既時候, 我地隻杯仲轉過不停. 落黎果陣, 真係差o的企唔穩架! XD
 
由於一切太順利, 所以我地真係要四圍HEA, 先等得到佢放煙花.  但係都值既, 個煙花真係唔錯, 幾靚, 幾特別.  香港迪迪尼雖然係細左o的, 但係平日黎反下, relax下又真係幾唔錯既, 特別係响唔駛$$既情況下~ 呵~ 我諗我下次再黎, 都要係幾年後既事喇~ :P
 
keke, 又想睇相?! 黎呢樹『Ping 香港迪迪尼一日遊』啦~