新成員介紹

雖然『小企鵝‧大長征』仲未係香港上映, 但係坊間已經有好多佢既產品喇.  而身為企鵝迷既我, 當然已經有幾件係手啦. 其實呢o的物品唔係我自己買架, 反而係身邊既朋友買俾我, 我o的朋友真係對我好好架 :D

1. 企鵝爆谷桶一個
2. 企鵝水杯一隻
3. 企鵝父子公仔一對
4. 企鵝畫冊一本

哈哈... 係咪好靚呢?! 我依家日日都用緊企鵝杯飲水架, 有左佢, 水都飲多左 =D

另外, 幅相既背景係咪好型呢? 佢其實係我張床架黎~ 哈哈, 估唔到我連床單都係Pingu呢?! XD

BTW, 得閒去『小企鵝』個site行下, 佢有個企鵝Game都幾得意架~ 想玩的話, 可以Click -> 呢度 :D

[中國‧香港] 法國私房菜 - Allez Allez

識我既人, 都知道我好鍾意食野, 亦都好捨得駛錢食野.... 近期去過一間非常之正既食肆, 不得不向大家推介... 佢就係專做法國私房菜既『Allez Allez - 酒池肉林』

認識呢間店舖, 係從一o的網上既食評開始... 由於好多人都話正, 所以我就決定一試...

正如好多食評所講, 佢地食物, 環境同氣氛都係一流, 非常適合舉行慶祝活動... 不過, 佢地reservation 既service 就真係比較差喇. 一般既食肆接到電話, 都會講一講自己既店舖名, 但係佢地就無, 而且態度亦不算友善, 初初我真係以為自己打錯電話架.  :P

講返o的食物, 當日我叫左$488 Six Courses (with wine) 果個 set.  初初我都有o的唔捨得, 但係人一世物一世, 反正都係試, 不如就試個 guarantee 有 private room 既 set 啦, 而且都係久唔久豪一次唧~ 最後我揀左以下呢幾款食物:

• Appetizers: 酒池肉林特色焗蠔 x 2, 香煎法國鵝肝配草莓汁, 意大利巴馬火腿配炸釀白菌
• Soup: 法式海龍皇湯 x 2
• Sherbet: 青檸雪皅 x 2
• Main: 燒羊鞍配香蒜燒汁, 焗牛柳
• Dessert: 酒池肉林梳乎厘, 焗芒果千層皮配雪糕

除左個 Lamb 之外, 其他既食物都非常之滿意, 個 Lamb 唔太好食, 可能係因為叫左七成熟, 所以入口唔夠嫩滑.  而當中最好食既, 莫過於係個焗蠔同鵝肝, 非常之juicy & 新鮮, 連一向唔食鵝肝既我都覺得好好味~

雖然係叫左六個 Courses, 但係食下食下又食得晒喎, 唔會話食到頂住個胃.  可能係o的菜慢慢一個個咁上, 個環境氣氛好, 又有得出去露台望下街, 所以就唔覺食左咁多野囉~ (據聞如果當日放煙花的話, 工作人員仲會帶你上天台睇添)

總結來講, 雖則佢係貴, 但係絶對係物有所值, 相比一o的唔好食既酒店buffet, Allez Allez 絶對係抵食~

是日午餐 - 白汁海鮮雞肉貝殼粉

哈, 今日又係屋企整lunch, 今次就複雜少少, 整左『焗白汁海鮮雞肉貝殼粉』

其實呢個意粉既概念係來自 Amaronis 既 Seafood Fettucine with Tomato Cream Sauce (佢地依家已經轉左用千層闊麵 instead of 大貝殼粉).  由於覺得 Amaronis 整得好好味, 所以就試下係屋企整... 雖然同人地既無得比, 但係個口感都唔錯, 用貝殼粉包住晒o的餡料, 一啖食晒落口, 原汁原味好好味~

P.S. 今次就有少少懶, 無自己整個白汁, 用左金寶忌廉蘑菇湯~ :P

是日午餐 - 芝士腸火腿焗薯

無無聊聊係屋企, 又唔想出街, 所以就係雪櫃搵o的剩餘物資整左今日既午餐...

材料如下:

• 薯仔
• 火腿
• 芝士腸
• Mascarpone 芝士
• 酸忌廉

雖然o的材料係有少少九唔搭八, 似 Pasta/Pizza 多o的, 但係佢係一個焗薯黎架... 哈哈哈

Lunch 都咁食法, 真係想瘦都幾難~ XD

我的新手機

繼NEC DB2000鐵面王子及SONY Z18 之後, 我終於都換左 Panasonic VS3 喇....

其實想換手機都有好一段日子架喇, 但係睇極都睇唔岩... 我都只係想要一部有基本通話功能, 大品牌, 身型輕巧, 外表又見得下人既摺機唧... 點解都會咁難?! 唔通咁都算係要求高?? 我真係接受唔到拎一部兼具電話功能既DC, 部部都130g+, 我部DC都係得110g之嘛, 點解會咁架.... :S

其實之前都睇中過另一部手機, 佢就係 三菱M800.  佢個外型真係好勁, 可以自己config LCD閃燈 (即係話我可以整隻Pingu係度閃閃下 XD).  但係佢有個好致命既問題, 就係佢睇唔到繁體字... 咁... 我又點買得落手呢... sigh....

好彩最後都有 VS3 既出現, 雖然佢既config唔算得上話好好, 但係都可以接受... 好多人都問點解唔等 VS7, 原因有幾個: 1) 我部 Z18 唔係太等得 2) 二百萬相機+藍芽+插咭+mp3對我黎講唔係太重要 3) VS3 無外mon, 個樣型o的又靚o的 (其實呢個係一大缺點, 我一定要打開部機先知邊個打俾我)

不可不提, 呢部機有DIY外殼功能, 我呢個無聊人又點會放過丫... 所以我就用我僅存既 Photoshop 知識, 整左幾個 DIY 殼, 佢地都幾靚幾得意架 :D

 

雙層榛子朱古力慕斯蛋糕

作為呢個Blog既頭炮, 梗係我近期最滿意既『Praline Chocolate Mousses Cake』啦!!

呢個蛋糕就勁喇, 佢係由以下四個部份組成:
 

1) 朱古力榛子脆脆餅底

2) 朱古力慕斯

3) 朱古力清蛋糕

4) 榛子慕斯

我覺得最好味既, 當然係個脆脆餅底, 佢加埋o的慕斯一齊食, 個口感非常之好, 一o的都唔會覺得「漏」。而最為自豪既, 就係個decoration, 今次連個邊既朱古力格仔都係自己做架, 都算係咁囉~ :D

唔知食過既人, 又覺得好唔好味呢? //think

 

寫Blog由來

一路都有寫Blog既念頭, 但係遲遲都無咁做, 原因就梗係我『懶』啦!!!

而我寫Blog既目的就更加之明顯, 當然係為左記錄我既製成品啦~ :D
所以, 千祈唔好諗住我會係呢度講秘密喎, 唔係你一定會失望架... 呵呵!!

我黎緊會將我以前整過既心血結晶, 慢慢一個個咁post返上黎, 希望你地會喜愛啦~ ^_^