百佳限量版Pingu~

嘩哈哈~ 繼中原電器之後, 依家連百佳都識貨, 揀左 Pingu 黎做主角喇~~
keke... 我呢個 Pingu 迷當然唔會錯過啦, 我會好努力儲印花架喇~
暫時 Target 係『紙巾套』, 『電話座』&『相加A』~
即係話... 至少要65個印花....
我既朋友仔呀~~ 記得幫手儲呀~~ 謝謝~  

[中國‧香港] Regala Cafe & Dessert Bar

話說係好耐之前... 新假期登左一篇關於九龍富豪酒店『Regala』既甜品自助餐介紹...
我地見到就好想去試, 因為只係$88蚊, 覺得好抵~ (之前去銅鑼灣西武Regala 食個tea set都要過百!! =P) 所以就打電話去book啦, 點知勁full, 而且由於係成家人一齊去既關係, 改下改下, 就變左成個月後喇~ 不過唔知點解, 我地去果日又無乜人喎... 可能個個去晒書展啦~

講返o的甜品...  其實我樣樣都有拎少少~  款式當然唔夠Haytt 既Tiffin多啦(應該話差好遠...)
o的Cake 無晒佢都會refill, 不過fill黎fill去都係果o的.. -_-
老實講... 佢既招牌『士多啤梨拿破崙』一o的都唔好食, o的custard好實, 比起西武分店叫既差好多皮 -_-!! 有可能以前係即叫即整既關係啦(果時一份賣成50幾蚊!! 不過依家食唔到lu, 西武摺左, 連佢都摺埋...)

雖然個Napoleon係有o的失望, 不過都有o的唔錯既甜品既~ 
個『古古力慕斯蛋糕』幾得下! 佢同一般既 Cake 唔同, 中間層Mousse 好似雪糕咁凍, 食落又好滑, 好特別~
個『蘋果金寶批』亦都幾好, 清清地, 唔太rich, 我爸爸媽媽既至愛~
個『芒果軟芝士蛋糕』亦都好好, 賣相同口感都一流, 不過如果佢用Mousse 黎取代Chesse 會仲好~
其中有個甜品好得意, 用生果扮壽司, o的飯用甜既糯米飯做~ 不過得意唔等於好味~ =P

總括黎講, 我覺得呢個 buffet 唔太好食, 我寧願去o的好食既 Cake Shop 叫件切餅好過~
Tiffin真係好食好多, 不過人地就收緊雙倍價錢~ 所以話... 一分錢一分貨係無錯既~ 不過無論 Regala 定 Tiffin, 食完個 Dessert Buffet 都一樣好想食咸野, 始終食得太多甜品都係唔得既~

Pingu Baby Clothes

哈哈哈哈~~ 所有即將有BB 既朋友, 你地唔好彩喇~
今後我會送既BB 禮物, 都會係Pingu衫仔 / Pinga 裙仔~~
因為我發現到一間shop, 佢竟然有得賣Pingu BB 衫, 連蛤蜊衣都有, 勁!!!
你地既BB將會一出世就要扮企鵝, 哈哈哈~

[中國‧香港] 小肥羊

我呢個大鄉里, 上個星期先第一次去食『小肥羊』~
其實想去好耐, 只係太多人, 一路都無意欲排隊等位打邊爐~
終於, 上星期同妹妹去左喇, 三十幾度高溫, 係香港人先會去冷氣房打邊爐架唧~

講返正題, 我覺得佢個湯底真係唔錯, 好有味, 而且好特別~
唔似得譚魚頭果o的周街都食到/自己都整到, 所以雖然佢係貴, 但係值得既~
除左個湯底, 我覺得佢既墨魚滑&豬紅都好唔錯, 豬紅做到好似豆腐咁滑, 出面真係食唔到~
不過呢, 我諗下次就唔會叫肥牛/羊喇, 唔覺得特別好食, 而且貴之餘, 又會整到個湯底好肥~

一路都聽到有人話小肥羊既service好差, 直至叫甜品之前, 我都唔覺, 因為o的侍應好友善~
但係當我地等左廿分鐘先黎個甜品, 仲要懷疑佢拎錯左既時候, 我地問佢呢件係乜黎, 佢竟然答:『咪你叫果樣囉!』真係激到啤一聲, 之後問個經理先確認到係黎錯, 咁佢地就拎走左啦... 點知一等又廿分鐘, 我地見唔妥, 咪再問究竟係咪會黎架, 唔黎就埋單啦... 點知, 部長拎返之前果件出黎, 話係我地叫果樣喎...
真係呢... 激到死左... 等左廿分鐘, 原來仲未拎返入廚房... 算!!! 最後我地都無要個甜品, 埋單走人~
所以話呢, 食小肥羊做乜叫甜品, 食甜品就應該出去食!!

是日下午茶 - 日式燒扇貝

焗蠔就食得多, 今次玩焗扇貝, 唔用蒜蓉焗, 改用沙律醬, 一樣咁好味~~
同場加映蒜蓉蒸扇貝~ 超級多粉絲~ yummy yummy~

花生曲奇

由於上次既失敗, 所以我決定再整多次~
今次都係『Peanut Cookie』, 不過唔係用曲奇槍, 而係用唧咀+豬女印~ 幾靚~

 

Pingu 's Recipe

我實在太鍾意件Tee 喇, 所以就用僅餘既Photoshop 知識, 將佢轉做長形黎做我既Logo~

東京手信

由於我嫂嫂要去日本公幹, 所以就托佢幫我買Pingu~
大早我都打定輸數, 因為o的地點比較偏遠, 連我都唔識去...
 
點知.. 佢好犀利, 所有都買晒返黎!!!
總共係一個鐘, 兩隻錶 + 兩件Pingu T-Shirt!! 勁勁勁勁勁!!
其中件Pingu T-Shirt 超級鍾意, 因為太襯我喇!! 哈哈哈!!

是日午餐 - 茄汁長通粉

又係茄汁長通粉~  方便又好味~

異國風巧克力慕斯

嘿嘿, 噚日我除左整紙包蛋糕之外, 仲整左『異國風巧克力慕斯 Exotique』~
個名係咪好勁呢? 其實佢係日本一間甜品店『秋韻』既人氣糕點~~

呢舊野就巴閉喇, 整既時候好似砌緊積木, 一層層咁砌上去~
佢入面有古古力海綿蛋糕, 白古古力慕斯同熱情果果凍~
個樣係咪好得呢? 拍得住o的大酒店架, 唔食淨睇都覺得掂!!! :D

 

[中國‧香港] 俏江南

佢就巴閉喇, 係中國好多城巿都有分店, 我第一次响上海食, 感覺好新鮮, 佢終於黎左香港喇..

話晒第一次去, 當然要叫佢既首本名菜, 試試佢既水準啦~ 
我地叫左皇室濃汁魚唇 , 麻醬油麥菜, 江石滾肥牛 & 石烹豆腐花 . 樣樣都好得, 肥牛同豆花仍然係現場製作, 同係上海食差唔多, 唯一只係價錢唔同.. 哈哈..

不過呢, 上海既service 就比香港好, 佢會好detail 咁介紹用江石黎烹調有乜好處, 亦會介紹豆花果七小碟醬應該點食.  如果我唔係响上海食過, 都未必識食~ :P好, 就等我介紹下點食啦~ 個豆花係現場製作, 廚師首先將豆汁倒入器皿, 再放入好熱既江石攪拌, 五分鐘後就變成軟滑既嫩白豆腐花. 你可以選擇唔同既醬料溝成咸既, 甜既 or 辣既味道~ 我個人就最喜愛咸食~

丫, 不得不提, 佢既裝潢都真係幾靚架, 好grand, 成個大劇院咁. 而且佢仲上過志雲飯局, 即係同劉華食果間囉~ 下次我都要試下個文房四寶, 個賣相真係好型~

紙包蛋糕

我細細個去親麵包舖, 都係買『紙包蛋糕』, 因為最好食~ 所以呢, 想整好耐架喇~~ :DD
今次既製成品, 都幾睇得架, 不過食落既口感就唔係太好, 下次都試過先~
 

[中國‧香港] 好時沙爹

上星期又去左『好時沙爹』食飯~ 可能因為世界杯既關係, 九點幾去都勁多人...

今次除左叫左必叫既海南雞飯之外, 仲叫左另外兩樣招牌菜: 炒蘿蔔糕 & 地道喇沙. 
大早以為個蘿蔔糕咁大碟, 好難先食得晒... 但係食落又唔係喎, 辣辣地, 好有味, 好快就俾我食晒~ :P
至於個喇沙, 我個人就唔太鍾意, o的咖喱味好濃, 食落好滯, 都係個海南雞好食好多~~~ :DDD

花生曲奇

好耐無整過曲奇餅, 噚日除左整左個香蕉蛋糕之外, 仲整左『Peanut Cookie』~
曲奇一向都係我既弱項, 次次都整到硬掘掘, 唔得鬆脆... 雖然今次都唔叫好, 不過都叫有進步啦!
 
本身係整唧唧曲奇既, 但由於o的麵糊太硬, 好難唧出個形, 所以最後改變策略, 轉左用曲奇槍~
呢隻曲奇真係好香好香, 好有花生味~~ yeah~
 

香蕉蛋糕

我細細個就好鍾意食『香蕉蛋糕』~  呢排鍾意整o的簡簡單單既Cake, 所以就揀左佢~
步驟好簡單, 只要溝埋o的材料就okay, 焗既時候好香, 食落又好好味~ 正~~
 

雞翼大餐

近排唔知點解好想食雞翼, 所以一連兩日都整左雞翼黎食~
分別係人地媽媽招牌菜『蒜蓉雞翼』同杏花樓招牌菜『檸汁雞翼』~

玉桂蘋果蛋糕

諗下諗下, 6月好似無乜整過蛋糕... 唯一只係整過個『Cinnamon Apple Cake』俾爸爸慶祝父親節~
呢個蛋糕食落有蘋果粒粒架, 好有口感~

keke, 有無發覺我排愛上整蘋果蛋糕呢?!, 因為方便又好味, 爸爸媽媽都愛吃嘛~ :D
 

焦糖蘋果蛋糕

由於屋企有好多青蘋果, 所以就整左呢個『Caramel Apple Cake』~
焗既時候有陣陣清香~ 正呀~
 

北海道手信

哈哈哈... 我哥哥同嫂嫂去完北海道Honey Moon, 買左好多手信俾我丫~~ 

• Ping Fruit Jelly: 呢個竟然仲有得買~ 好開心丫~~ :DDD


• 六花亭士多啤梨古古力: keke, 呢個專登落order既~ :P


• Cake Box: 好靚~ 好靚~~


• 白之戀人朱古力屋Box Set: 呢個勁丫, 有晒材料同圖板, 教你整古古力屋仔!!!


• Penguin Finger Puppet: 呢個又係勁得意丫!!!

哈哈, 由於我有好明確既喜好(i.e. Cooking & Penguin), 所以我哥哥特別買得多野俾我~
雖然佢買唔到我order既Pingu T-shirt, 但係佢買既古古力屋同Finger Puppet, 我都超鍾意丫~
佢仲話白之戀人果度有專人教你整野食添架, 搞到我好想去丫~~

超級芒果船

由於屋企既雪糕存貨大增, 為左減輕雪櫃叔叔既負擔, 所以就整左呢隻『超級芒果船』~
佢既材料就巴閉喇, 有芒果啫喱, 新鮮芒果肉, 芒果雪糕同埋芒果汁, 勁呀~

楊枝金露

呢排o的芒果真係好當造, 所以忍唔住又買左o的返屋企~
今次用左黎整『楊枝金露』, 味道就普普通通啦, 都係稻香果o的好味o的~

是日午餐 - 焗芝士茄汁長通粉

其實今日既午餐係Pizza 既延續... 將用淨既材料整左呢個『焗茄汁長通粉』...
入面既材料就多喇, 有番茄, 磨菇, 洋蔥, 辣肉腸同火腿~ Yummy~

[中國‧香港] Sabatini Ristorante Italiano

係5.1 勞動節, 我又去左食好野... (其實我成日都去食好野  :P)

今次我去左帝苑酒店入面間『Sabatini Ristorante Italiano』食意大利野...
佢既環境氣氛都幾好, 而且所有野食都唔錯...
1. 風乾火腿蜜瓜
2. 白松露生牛肉
3. 雜菜湯 + 雜菌湯
4. 燒羊扒
5. 波士頓龍蝦意大利飯 + 配炒雜菇

我特別喜愛佢既燒羊扒, 真係好食到不得了, 而佢個雜菌湯都唔錯架, 好有菇味之餘亦唔太流, 洽到好處~ 而個生牛肉都幾得意, 只不過我真係唔知邊o的係Truffle, 我諗其實佢只係用左White Truffle Oliver Oil~ :P

其實佢o的dessert都幾出名架, 不過因為太飽, 所以無叫到~ 最後淨係要左o的朱古力~

蜜蜜燒雞翼

近排又開始整返野食, 搵返唔少人生樂趣...

 
不過整得太多甜野, 都想食返o的咸野... 所以就整左呢個『蜜蜜燒雞翼』!
雖然佢係咸點, 但係由於我落左唔少蜜糖, 所以都幾甜架.. 不過我媽媽都話好食~ :D

栗子蛋糕

就到母親節, 見我媽媽上次食芒果蛋糕食得咁開心, 所以今日整左佢既至愛『Chestnut Cream Cake』俾佢~

今次係我第一次整Cream Cake, 個decoration 都係自己做架~ :D
我淨係批cream 都批左好耐, 唧完又再唧, 反覆玩左幾次, 我諗個樣都算合格呱~ :P
我見個cake 寡得滯, 所以特登加左個朱古力牌俾佢... 當係同我媽媽預祝生日啦~ haha XD

btw, 為左無咁悶, 我特登係個蛋糕中間加左層朱古力脆脆落佢, 令到個口感好o的 :P
  

是日下午茶 - 芝士辣肉腸芝士薄餅

完完全全係肥仔餐, 好高卡路里, 落左好多好多芝士.. :P

芒果啫喱乳酪芝士餅

要數當時得令既生果, 都應該係芒果喇... 依家又平又靚, 最適合用黎整蛋糕~ :D
亦因為咁, 所以我噚日就整左呢個『Mango Jelly Layer Cake』!!

haha.. 淨係睇個樣就已經夠照啦, 都真係幾靚架, 多得我妹妹幫我做decoration.
初初我係打算用芒果茸係個cake上面整心心圖案架, 不過你都見啦, 完全未到家, 所以最後都係要用o的芒果肉黎遮醜~ :P

呢個蛋糕口感幾特別架, 中間有一層啫喱, 唔會話好重芝士味, 唔錯唔錯~
當你打橫咁切黎食, 仲有6個層次添: 1) 芒果, 2)啫喱, 3)乳酪芝士, 4)啫喱, 5)乳酪芝士 & 6) 餅底.. 勁呀~ :D
 

是日午餐 - 鹹牛肉焗薯

又黎個簡單放便既Lunch先~
今次整左咸牛肉焗薯, 加埋sour cream, 好好味丫~
始終覺得用佢黎配焗薯係最襯既! :D

鮮果撻

噚日去左朋友屋企hea, 由於唔想兩手空空, 而佢又曾自稱超喜愛食Fruit Tart, 所以就整左8件過去喇~
一如以往, 我整既野就算唔食得, 都睇得, 個賣相都呃得下人架! XD
不過平心而論, 今次個Tart 既 Custard無乜味, 下次都係唔好溝粉喇 :P